الذكرى الثالثة لإستشهاد 1035 مصرى

مع السلامة

بقلم: طارق شرف الدين
11 فبراير 2009


كنت اتابع سفر اسرتى على العبارة المنكوبة السلام 98 وكان اخر اتصال تليفونى تم مع محمد ابنى وهو على العبارة عندما سالتهه
طارق - اخبارك اية يا محمد
محمد - احنا بخير الحمد لله
طارق - عملتوا اية حجزت كابينة ؟
محمد - لا مافيش كباين فاضية كلها مليانة وحجزنا فى البولمان
طارق - ازاى تحجز فى البولمان انت معاك امك واخواتك بنات المفروض تاخد كابينة بأي طريقة
محمد - خلاص يابابا مافيش مشكلة احنا فى البولمان وقدامنا التليفزيون واحنا مرتاحين ماتقلقش والسفينة خلاص اتحركت والخط هايقطع
طارق - طيب خد بالك من اخواتك وامك واول ما توصلوا مصر تتصل بيا على طول
محمد - حاضر يا بابا مع السلامة
طارق - مع السلامة .. مع السلامة .. يا اغلى من رات عينى
مع السلامة .. ياكل اللى فات واللى جاى فى حياتى
مع السلامة .. يا كل دنيتى وعمري
مع السلامة .. يا كل ضحكة وبسمة ونكتة
مع السلامة .. يا مدرسة ودكتور وغدا وعشا وعلاج
مع السلامة .. يا ادب وتربية واخلاق
مع السلامة .. يانور الشمس وضي القمر
مع السلامة .. ياسند يا عكاز
مع السلامة .. يالمة وشلة ورحلة
مع السلامة .. يا فيلم وكتاب ومسرحية
مع السلامة .. ياسهرة تلفيفزيونية
مع السلامة .. يالب وسدانى وشوية فول وطعمية
مع السلامة .. يا مش بالطحينة واكلة رنجة وفسيخ
مع السلامة .. يا رز وسلطة وشوية طبيخ
مع السلامة .. يا كيلو لبن وحتة جبنة بيضا مع بتيخ
مع السلامة .. يا رمضان ودخلة العيد
مع السلامة .. يا عيدية ولبس جديد
مع السلامة .. يا جنينة وموبايل وملاهى فى يوم سعيد
مع السلامة .. يا ريحة حلوة واكلة طعمة فى النادى قدام البسين
مع السلامة .. يا قلوب طيبة
مع السلامة .. يا حنينين
مع السلامة .. يا خناقة كروية ومين كسب مين
مع السلامة .. يا غنوة حلوة فى العربية .. مش ناسيها طول السنين
مع السلامة .. يا احرام جميل لبسناة فى الحرمين
مع السلامة .. يا طواف وسعى ومنى وعرفات ومزدلفة .. ورجم الشيطان الرجيم
مع السلامة .. يا شواية وفرخة ولحمة وهبشة وخطفة وضحكة
مع السلامة .. يا بلطية مقلية وشوية بطاطس محمرين
مع السلامة .. يا بحر وشمسية واحنا كنا مصيفين
مع السلامة .. يا كتاب وكراسة وقلم وبرايو ومين اخد اللوان مين
مع السلامة .. واغسل العربية وخلى بالك من البنزين
مع السلامة .. يا كرت شحن والرضيد خلص ياتري كنت بتكلم مين
مع السلامة .. يا رنة ورسالة وكمان مادلية المفاتيح
مع السلامة .. يا مصلية ويا سبحة للتسابيح
مع السلامة .. يا عباية وجيبة وبدلة
مع السلامة .. يا مريلة وشراب وشنطة
مع السلامة .. يا شجرة زرعتوها اساميكم عليها مكتوبين
مع السلامة .. يا لعبة وعجلة ةعرةسة وعربيتين
مع السلامة .. يا جهاز الولاد وكمان البنتين
مع السلامة .. يا شيكولاتة وشيبسي ومصروف المدرسة والكانتين
مع السلامة .. يا شوارع تعدوها تبصوا شمال ويمين
مع السلامة .. يا شيلة حلوة على السلم لما كنتم نايمين
مع السلامة .. يا شهادة المدرسة .. مع السلامة يا نجحين
مع السلامة .. يا ظابط يا دكتورة يا مهندسين
مع السلامة .. يا حلم حلمتوه صاحيين
مع السلامة .. يا اتوبين وتاكسي معاكم فلوس ولا مفلسين
مع السلامة .. يا شريط كاست وكمبيوتر واسطوانة سي دى
مع السلامة .. يا يا اتاري وبلاي استيشن وجاكات بيظين
مع السلامة .. يا خناقة على ماتش او فيلم وانتم سهرانين
مع السلامة .. يا صحة وتطعيم يحميكم من المرض اللعين
مع السلامة .. يا سلسلة وغويشة دهب او مقلدين
مع السلامة .. يا خضة ورعشة لما كنتم عيانين
مع السلامة .. وانتم ماشيين
مع السلامة .. يا فرحتى بيكم وانتم راجعين
مع السلامة .. يا بمبرز وكفولة وملاية اتغيرت لما كنتم فى البرد نايمين
مع السلامة .. يا طفولة وصبا وشباب
مع السلامة .. يا بنات حلوين
مع السلامة .. يا تيتا وعمو وخالو
مع السلامة .. يا دنيا انطفت كنتم فيها منورين
مع السلامة .. يا كل العالم اجمعين
مع السلامة .. يا شجرة زرعتها بقت فروعها مقطعين
مع السلامة .. يا بنت شرف الدين
مع السلامة .. يا ولاد شرف الدين
مع السلامة .. يا كل الدنيا
اللهم اجعلنا من الصابرين
مع السلامة .. مع السلامة .. مع السلامة